Монгол Улсын Их хурлаас есдүгээр сарын 10-ний өдрийг улс төрийн хилс хэрэгт хэлмэгдэгсдийн дурсгалыг хүндэтгэх өдөр болгон шийдвэрлэж, тэмдэглэх болсноос хойш 23 жил өнгөрчээ. Энэ хугацаанд төрөөс улс төрийн хилс хэрэгт хэлмэгдэгдсэн иргэдийн хэргийг хууль хяналтын байгууллагаар шалгуулан, хилс хэрэгт холбогдогсдыг цагаатгуулж, нэр төрийг нь сэргээлгэх, тэдний дурсгалыг мөнхжүүлэх, хэлмэгдсэн иргэдийн талаар судалгаа хийж, түүхийн бодит үнэнийг олон нийтэд түгээн сурталчлах зэрэг ажлыг зохион байгуулж ирсэн.
Түүнчлэн хэлмэгдэгсэд, тэдний гэр бүл үр хүүхэд төрөл төрөгсдөд хуульд заасны дагуу нөхөн олговор олгох, нийгмийн халамжийн зарим дэмжлэг үзүүлэх, энэ ажилд төр захиргаа, хууль хяналт, олон нийт, аж ахуйн нэгж байгууллага, иргэдийг татан оролцуулж хамтран ажиллаж байна.
Тухайн өдрийг тохиолдуулан дүүргийн Цагаатгах ажлыг удирдан зохион байгуулах салбар комисс Гүндү Ёндон равжаалин хийд хамтран Улс төрийн хилс хэрэгт хэлмэгдэгсдэд зориуслан Бурхан багшийн хөшөөг босгож нээлтийг 9 дүгээр сарын 9-ний өдөр зохион байгуулж хэлмэгдэгсдийн үр хүүхэд ач зээ нарт хүндэтгэл үзүүллээ.
Үйл ажиллагаанд Монгол Улсын ЦАУЗБК-ын захиргаа дүн шинжилгээний албаны дарга Л.Очирсүрэн, Нийлэлийн ЦАУЗБСК-ын нарийн бичгийн дарга М.Халтар, дүүргийн ИТХ-ын дарга бөгөөд ЦАУЗБСК-ын дарга С.Даваарсүрэн, НИТХ-ын Төлөөлөгч, дүүргийн Засаг дарга Ц.Сандаг-Очир, Засаг даргын Орлогч Т.Отгонболд, ИТХ-ын ажлын албаны дарга бөгөөд ЦАУЗБСК-ын нарийн бичгийн дарга Б.Балжинням, ЗДТГ-ын дарга П.Баттүшиг болон албаны хүмүүс оролцлоо.
Багануур дүүргийн Цагаатгах ажлыг удирдан зохион байгуулах салбар комиссоос материалаа бүрдүүлэн өгч, дүүргийн шүүхээс нөхөн олговор авах эрх үүссэн нэг иргэнд 80 сая төгрөг, нэг иргэний нэг сая төгрөгийг олгоход бэлэн болоод байгаа ба өнөөдрийн байдлаар дүүргийн хэмжээнд хэлмэгдэгсдийн үр хүүхэд, ач зээ 81 иргэн бүртгэлтэй байна.