Дүүрэгт ажиллаж амьдарч байгаа залуучуудын хөгжлийг дэмжих, нийгмийн оролцоог нэмэгдүүлэх, байгууллага аж ахуйн нэгжийн залуучуудын зөвлөлийн үйл ажиллагааг идэвхжүүлэх, салбар дундын уялдаа холбоог сайжруулах, дүүрэг орон нутгаа хөгжүүлэхэд хувь нэмрээ оруулах, залуучуудад тулгамдаж буй асуудлыг хэлэлцэн төлөвлөгөөнд тусгах зорилго бүхий “Багануурын хөгжил-Залуучуудын оролцоо” сэдэвт уулзалт 2023 оны 10 сарын 18-ны өдөр төрийн захиргааны байгууллагын албан хаагч залуучуудын уулзалтаар эхэллээ.

Энэхүү уулзалт арга хэмжээг Багануур дүүргийн Залуучуудын хөгжлийн салбар зөвлөл, ЗДТГ, ГБХЗХХ, Байгууллагуудын залуучуудын зөвлөл хамтран салбар салбарын хүрээнд аравдугаар сарыг дуустал зохион байгуулна.

Уулзалтаар ГБХЗХХ-ийн дарга Т.Хашлянхуа “Залуучуудын хөгжлийг дэмжих тухай хууль”, Дүүргийн ИТХ-ын төлөөлөгчдийн асуудал хариуцсан туслах, ХНХТ-ийн сургагч багш Н.Оюунтуяа “Төрийн албан хаагчийн ёс зүй”, Дүүргийн Засаг даргын орлогч бөгөөд дүүргийн залуучуудын хөгжлийн зөвлөлийн дарга Б.Балжинням “Дүүрэгт хийгдэж буй хөрөнгө оруулалтын ажил”, Хичээнгүй үндэс ТББ-ын тэргүүн, бүсийн сургагч Н.Буяндэлгэр “Залуучуудын манлайлал,оролцоо” сэдвийн хүрээнд илтгэл тавьж, залуучууд санал хүсэлтээ илэрхийллээ.