Дүүргийн Засаг даргын бүрэн эрхийн хугацааны 2016-2020 оны үйл ажиллагааны хөтөлбөр, Эдийн засаг, нийгмийг 2017 онд хөгжүүлэх үндсэн чиглэлд тусгагдсан мал аж ахуйн талаар хэрэгжүүлэх бодлогын хүрээнд дүүргийн малчдад тулгамдаж байгаа асуудлыг шийдвэрлэх, хил залгаа сумдын хамтын ажиллагааг сайжруулах зорилготой дүүргийн харьяалалтай 360 малчдыг хамруулсан "Малчдын зөвлөгөөн"-ийг зохион байгууллаа. Уг зөвлөгөөнд Нийслэлийн Засаг даргын орлогч Д.Энхтөр, Нийслэлийн хүнс, хөдөө аж ахуйн газрын дарга Д.Баянбат, Нийслэлийн мал эмнэлгийн газрын дарга А.Нарантуяа, Дүүргийн ИТХ-н дарга С.Даваасүрэн, Дүүргийн Засаг дарга Ц.Сандаг-Очир, Төв аймгийн Баяндэлгэр сумын ИТХ-н дарга Б.Байгалмаа, Засаг дарга Г.Баасанжав, Төв аймгийн Мөнгөнморьт сумын ИТХ-н дарга С.Энхбаатар, Засаг дарга С.Наранцэцэг, Цэнхэрмандал сумын Засаг дарга н.Золжаргал нар хүрэлцэн ирсэн. Нээлтийн үйл ажиллагааг ИТХ-ын дарга С.Даваасүрэн нээж үг хэллээ.
2016-2020 оны үйл ажиллагааны хөтөлбөрт хөдөө аж ахуйн салбар тэр дундаа мал аж ахуйн салбар малчдын ахуй амьдралыг ивээн тэтгэж хамтран ажиллах хөтөлбөр зорилгоо тодорхой тусгасан. Багануур дүүрэг жил бүр мал тооллогын дүнгээр нийслэлдээ тэргүүлж жил бүр өсөн нэмэгдэж өнгөрөгч 2016 оны мал тооллогын дүнгээр 178 мянган толгой тоолуулсан байна. Энэ олон малын цаана маш олон өрх гэр бүлүүд зэргэлдээх сумдууд аж төрж амьдарч байна. Багануур дүүрэгт харьяалалтай 700 өрхийн 2500 орчим иргэн малынхаа ашиг шимээр амьдрал ахуйгаа сайжруулж байгааг дурдсан юм.
"Малчдын зөвлөгөөн"-өөр малчдаас дараах санал хүсэлтүүд гарсан. Тухайлбал: Дүүргийн хэмжээнд нэгдсэн цагаан идээ мах худалдаалдаг зах бий болгох, тэтгэвэрт гарахад сайн дурын даатгалд хэрхэн хамрагдах, даатгалаар олгогддог эмийн худалдааг сайжруулах зэрэг бусад олон саналууд гарсан. Дээрх саналыг шийдвэрлэх боломжтой үгүйг судлахаар болсон.
Мал аж ахуйн уламжлалт арга ажиллагааг боловсронгуй болгож, малынхаа ашиг шим, гарц чанарыг нэмэгдүүлж, мал сүргийнхээ үүлдэр угсааг сайжруулж, бүтээгдэхүүн үйлдвэрлэлийг өсгөн дүүрэг орон нутагтаа оруулж байгаа хувь нэмрийг нь үнэлж, мал аж ахуйн салбартаа тэргүүлж яваа малчдыг шагнаж урамшуулсан юм. Үүнд Хүнс хөдөө аж ахуйн, Хөнгөн үйлдвэрийн яамны “Жуух бичиг”-ээр 3-р хорооны малчин Б.Бор, 1-р хорооны малчин Д.Ганболд, НИТХ-н хүндэт өргөмжлөлөөр 2-р хорооны малчин С.Дагвадорж, НИТХ-н хүндэт тэмдгээр 5-р хорооны малчин С.Эрдэнэцэцэг, Нийслэлийн Засаг даргын “Жуух бичиг”-ээр 3-р хорооны малчин Б.Нямсүрэн, 1-р хорооны малчин Ю.Батбаатар нар шагнагдсан юм. Мөн оны шилдэг малчнаар 4-р хороны иргэн А.Алтанхүү, Тэргүүний тариаланчаар Ч.Амгалан, П.Болорцэцэг тар шагнагдсан юм.
"Малчдад туслах сайн санааны аян"-д нийт 63 ААНБ, 5 иргэн нэгдэж 70,8 сая төгрөгийн эд материал мөн "Багануур" ХК-ийн 1100 ажилтны сэтгэлийн дэм болох /5,4 сая төгрөгийн үнэ бүхий/ 10 кг гурилыг зөвлөгөөнд ирсэн малчин бүрт гардуулан өглөө.
