Дүүргийн нийт ард иргэд, ахмад буурлууд та бүхэндээ Төгс буянт Монгол зурхайн ёсны XVII дугаар жарны “ Муу нүүрт” хэмээх гал бичин жилийг үдэж “Алтан унжлагад" хэмээх гал тахиа жилийг угтаж буй энэ мөчийг тохиолдуулан дүүргийн иргэдийн Төлөөлөгчдийн Хурлын Тэргүүлэгчид, Төлөөлөгчид болон хувиасаа сэтгэлийн цэнхэр хадгаа дэлгэн мэндчилье.
Улиран одож буй “Муу нүүрт” хэмээх гал бичин жил нь дүүргийн төр захиргаа, төрийн бус байгууллагууд, үйлдвэр аж ахуйн газар, хувийн хэвшлийнхэн болоод хотол түмэнд минь ивээлээ хайрласан, амжилт бүтээлээр дүүрэн он жил байлаа. Орон нутгийн өөрөө удирдах ёсны байгууллага нь өнгөрсөн 20 гаруй жилийн хугацаанд орон нутгаа иргэдийнхээ оролцоотойгоор хөгжүүлэх зорилт тавин ажилласан бөгөөд энэхүү нөр их хөдөлмөр бүтээлийн үр дүнд дүүргийн иргэдийн Төлөөлөгчдийн хурлын дэргэд Иргэний танхим байгуулагдаж, уг танхимаар дамжуулан иргэн бүр амьдарч байгаа орчноосоо эхлээд нийслэл хот цаашлаад эх орноо хэрхэн хөгжүүлэх талаар санал бодлоо чөлөөтэй илэрхийлэх, улмаар шийдвэр гаргах түвшин дэх иргэдийн оролцоо хангагдах таатай нөхцөл боломж бүрдлээ.
Түүнчлэн ДИТХ нь 11 дүгээр сарын 03-нд Анхдугаар хуралдаанаа зохион байгуулснаас хойш Төлөөлөгчдийн хуралдааныг 4 удаа Тэргүүлэгчдийн хуралдааныг 4 удаа зохион байгуулж дүүрэг орон нутагт тулгамдаж байгаа асуудлуудыг тухай бүрд нь шийдвэрлэж, хуулиар хүлээсэн үүргээ хариуцлагатайгаар хэрэгжүүлснээс гадна хороодын Иргэдийн нийтийн хурлын хэвийн, тасралтгүй ажиллах нөхцөл боломжийг бүрдүүлж ажиллалаа.
Дүүргийн ард иргэд үеийн үед бие даан хөгжихөөр зорин тэмүүлж байгаа бөгөөд улиран одож буй “Муу нүүрт” хэмээх гал бичин жилд УИХ, Нийслэл, дүүргийн ИТХ, хороодын ИНХ-ын дарга Тэргүүлэгчдийг сонгох шат шатны сонгууль амжилттай зохион байгуулагдаж дүүргийн нийт иргэд сонгогчид МАН-д итгэл үзүүлж 100 хувь мөрийн хөтөлбөрөө хэрэгжүүлэх нөхцөл бололцоогоор хангагдлаа. Нийслэлийн Багануур дүүргийн Засаг даргын 2016-2020 оны үйл ажиллагааны 5 бүлгийн 84 заалт бүхий хөтөлбөрийг, дүүргийн эдийн засаг, нийгмийг 2017 онд хөгжүүлэх үндсэн чиглэлийг Төлөөлөгчдийн хуралдаанаар оруулж батлуулснаар дүүрэг орон нутгаа хөгжүүлэх боломж нөхцөл бүрдэж өглөө.
Ургах улаан нарнаасаа цог хийморийн илчийг авч,
Уудам хєх тэнгэрээсээ уужрал ухаарлын ухаанаа сэлбэж,
Учран золгох хvн бvртээ сэтгэлийн сайхан vгийг бэлэглэж,
Ургаж байгаа сар шинийн баяр ийнхүү эхэлж байна.
Учран золгож буй “Алтан унжлагад" хэмээх гал тахиа жилд Багануурчууд та бүхэн минь олсон амжилтаа бататган, тавьсан зорилтоо амжилттай бүрэн хэрэгжүүлж, эрүүл саруул, энх тунх байж, юу санасан есөн хүсэл тань сэтгэлчлэн бүтэж, элгээрээ энх амгалан төрлөөрөө түвшин амгалан жаргахын өлзийтэй ерөөлийг өргөн дэвшүүлье.
Та бүхэн сар шинэдээ сайхан шинэлээрэй.
Сайн үйлс дэлгэрэх болтугай.