Монгол Улсын Хөдөлмөрийн баатар, Багануур ХК-ийн Уулын 2-р хэсгийн бригадын дарга Баттөмөр овогтой Баатар нь өвчний улмаас таалал төгссөнд Багануур дүүргийн Нутгийн удирдлагын байгууллагын зүгээс гүн эмгэнэл илэрхийлье. 

Тэрээр ЗХУ-д уурхайн экскаваторын машинчын курсыг төгсөж, Монгол улсад анх удаа ЭШ-15/90 алхагч экскаваторыг монтажлах ажилд Зөвлөлтийн мэргэжилтнүүдийн хамтаар амжилттай ажиллаж ашиглалтанд оруулсанаас хойш өдгөөг хүртэл тус машин бригаддаа тасралтгүй 27-н жил ажиллажээ.

Б.Баатар нь уурхайчин хамт олондоо нэр хүндтэй, Багануур дүүргийн бахархал болсон Хүндэт иргэн төдийгүй дүүргийн соёл урлагийн салбарт тодорхой хувь нэмэр оруулсан нэгэн юм.

Б.Баатарын хөдөлмөр зүтгэлийг Төр засгаас өндрөөр үнэлэн VII, VIII таван жилийн гавшгайч, Ардын хувьсгалын ойн медалиуд, Хөдөлмөрийн хүндэт медаль, Алтан гадас одон, Монгол Улсын Хөдөлмөрийн баатар цол тэмдэгээр шагнаж байжээ.

Түүний даруу төлөв зан, ажилч хичээнгүй, тусч, хүнлэг чанар нь Багануурчууд бид бүхний зүрх сэтгэлд үүрд дурсагдан үлдэх болно.

УМ САЙН АМГАЛАН БОЛТУГАЙ.

Багануур дүүргийн Иргэдийн Төлөөлөгчдийн Хурал